Американска агенција, одговорна за безбедноста на комуникациите во Белата куќа, соопшти дека броевите за социјално осигурување и другите лични информации во нејзината компјутерска мрежа можно е да биле компромитирани. Ова се наведува во писмото испратено до лица чии податоци можеби биле украдени, јавија американски медиуми.

Писмото е датирано од 11 февруари 2020 година. Во него се вели дека помеѓу мај и јули 2019 година можно е биле компромитирани личните податоци „поради упад во базата” на Агенцијата за заштита на информациските системи (ДИСА).

Белата куќа се уште не одговорила на барањето за коментар и не се дадени дополнителни детали во писмото. На пример, не се прецизира кој специфичен дел од мрежата на ДИСА е нападнат, ниту податоците за кои други лица биле компромитирани.

Овој упад е можеби главната причина за изненадувачката одлука на Доналд Трамп кој како директор на националната разузнавачка агенција на САД го постави Ричард Гренел, анализира новинарот Дејан Андоновиќ за Утрински брифинг на „Слободна ТВ“.

Гренел кој е американски амбасадор во Берлин и кој е медијатор во преговорите меѓу Белград и Приштина од засега нејасни причини е поставен на ваква одговорна функција. Се смета дека Гренел кој е човек од доверба на Трамп најверојатно би требало да ја спроведе истрагата за тоа што точно се случува околу разузнавачките и хакерските напади врз Белата куќа, канцелариите на претседателот и потпретседателот на САД како компромитирање на личните податоци и упадот во базата на агенцијата за заштита на информациските системи.

И самиот Гренел изјави дека не очекува да биде постојан директор на американското разузнавање, туку дека очекува на таа функција да биде само во одреден период. Како директор на агенцијата за разузнавање Гренел има задача да координира и управува со 17 воени и цивилни и разузнавачки агенции на САД меѓу кои ЦИА и ФБИ. Неговото наименување доаѓа во пресрет на американските претседателски избори, а најверојатно Трамп сака со поставувањето на својот човек да оневозможи евентуален нов хакерски напад како оној кој пред 2016 се случи со истекувањето на приватните меил пораки на тогашниот кандидат на демократите Хилари Клинтон што ја чинеше изборен пораз во трката за нов претседател на САД.