Османи: Слабостите што ги нотира извештајот на ЕК се заради политичката поларизација и блокадите на Собранието
Слабостите што ги нотира Европската комисија во својот најнов извештај за 2023 година за напредокот на Македонија во спроведувањето на реформите се заради политичката поларизација и блокадите на Собранието, рече денеска министерот за надворешни работи Бујар Османи. Според него, блокадата на парламентот оневозможува да се донесат реформски закони.
– Суштината на забелешките е политичката поларизација и блокирањето на Собранието. И тоа е сериозна порака до сите политички партии, не само до Владата, туку и до оние од опозицијата кои со години го блокираат Парламетот со филибастер само заради некои ситни дневно партиски поени и оневозможуваат да се донесат важни законски решенија. Има и слабости во судството. Но, единствениот начин да се бориме со овие слабости е да ги отвориме поглавјата 23 и 24 од преговорите за членство, бидејќи нема подобра борба од тоа. Секој што спречува отварање на поглавјата 23 и 24, ја спречува борбата против корупцијата – рече Османи.
Според Османи, иронија е да се повикувате на борба против корупцијата, а да го блокирате отварањето на преговорите за членство во ЕУ.
– Со отварањето на овие поглавка во суштина се отвараат сите рефлектори и инструменти на ЕУ за борба протов корупцијата. Политичари кои велат сакаме да се бориме со корупција, а не сакаме да се отворат поглавјата се контрадикторни, тоа е иронија и смеење во лицето на граѓаните – рече Османи.