Украинскиот претседател Володимир Зеленски го обвини Техеран дека „лаже“ за испраќањето на ограничен број беспилотни летала во Русија, велејќи дека силите на Киев соборуваат најмалку 10 дронови секој ден.

Во видео-обраќање, Зеленски ги отфрли наводите за ограничена испорака на беспилотни летала од Иран во Русија, посочувајќи дека Украина соборила 11 беспилотни летала само во петокот, објави Ројтерс.

– Ако Иран продолжи да лаже за очигледното, тоа значи дека светот ќе вложи уште повеќе напори да ја истражи терористичката соработка меѓу рускиот и иранскиот режим и како Русија му плаќа на Иран за таква соработка – рече тој.

Иранскиот министер за надворешни работи Хосеин Амирабдолахиан претходно за првпат призна дека Иран и испорачувал на Русија беспилотни летала, наведувајќи дека авионите биле испорачани на Москва пред нападот на Украина.

Амирабдолахиан изјави дека Иран и доставил на Русија ограничен број беспилотни летала месеци претходно.