Збирка раскази: Книжевен простор помеѓу зачудноста и реалноста
Издавачката куќа „Темплум“ ја објави книгата „Градски и шумски приказни“ од Мимоза Петревска Георгиева. Станува збор за збирка раскази што жанровски флотираат помеѓу зачудноста и реалноста.
Рецензентката Искра Гешоска за делото напиша: „Со својата книжевна техника, стилски гест и структурата во која се распределени ситуациите и ликовите, авторката создава антиидеологиски простор во кој секој читател може да го реконструира своето животно искуство и резиме. Книжевната субверзија на ова дело е единствена од повеќе причини, а една од нив е начинот на акварелно и нежно исцртување на моќни, но подземни социо-психолошки мотиви. Книжевните слики во збирката се проникнати со илустративниот имагинариум на шестмина македонски илустратори, со што добиваме едно комплексно книжевно-ликовно дело, кое со читателот комуницира на прв поглед“.
Автор(к)и на илустрациите во книгата се Горан Дачев, Бисера Георгиева, Маја Стефановска, Билјана Василева, Перо Георгиев и Ѓорѓе Јовановиќ. Мимоза Петревска Георгиева е новинарка со долгогодишно искуство во македонските медиуми. Авторка е на книгата „Живот вреден за живеење“ и на едукативната детска сликовница „Иван и Илина“. Сопруга е и мајка на три ќерки: Илина, Бисера и Ангела.
(Текстот е објавен во „Културен печат“ број 62, во печатеното издание на „Слободен печат“ на 26-27 декември 2020)