Започна судењето на родителите на момчето кое изврши масакр во белградското училиште
Денеска во Високиот суд во Белград започна судењето на таткото и мајката на 13-годишниот ученик кој уби девет соученици и чувар во основното училиште „Владислав Рибникар“ во Белград, во една од најголемите трагедии во поновата историја на Србија.
Судот најпрво треба да одлучи по предлогот на обвинителството за исклучување на јавноста од главниот процес заради заштита на интересите на малолетниците.
На првото рочиште се очекуваат воведните зборови на обвинителството и одбраната, доказните предлози и признавањето на вината на обвинетите.
Заедно со таткото и мајката, обвинети се и сопственикот и инструкторот на стрелачкиот клуб каде таткото го однел момчето и го научил да пука.
Во обвинението на Вишото јавно обвинителство во Белград беше предложено судот да го осуди таткото на затворска казна од 12 години, мајката на две и пол години затвор, додека сопственикот на стрелачкиот клуб и инструкторот во тој клуб беа осудени на затворска казна од по три години.
Против таткото и мајката се водат и две граѓански постапки по тужби од членови на семејствата за нематеријална штета поради смрт на блиско лице.
Родителите на жртвите во моментов се во судската палата.