Јапонскиот државен министер за економска и фискална политика на Јасутоши Нишимура добил коверт со жилет и закани по неговиот живот, јави новинската агенција Кјодо.

Ковертот бил доставен до зградата на Советот на министри во центарот на Токио, попладнето на 2 октомври. Вработен во кабинетот го отворил и го нашол жилетот и лист на кој рачно неколку пати било напишано „Умри”. Авторот на пораката се потпишал како „обожавател на министерот Нишимура”.

Полицијата уште истиот ден била известена за инцидентот и во моментот се води истрага. Од септември лани, Нишимура е одговорен за економската состојба на земјата, а сега и за мерките за борба против коронавирусот.