ГРЕКО не дал негативна забелешка за постоењето на функцијата на вицепремиерот Љупчо Николовски и не рекол дека е неприфатлива и некомпатибилна. ГРЕКО констатира дека не може едно лице (вицепремиерот) да биде надлежно и за санкционирање и за советување, тоа се две некомпатибилни работи, вели премиерот Зоран Заев за Слободен печат, по написите дека: „Неприфатливо е Кодексот на однесување да биде во рацете на вицепремиер”.

– ГРЕКО не дал негативна забелешка за постоењето на таков вицепремиер. Напротив, го поздравува новиот Етички кодекс и фактот дека е одредено лице (вицепремиерот) за негово сороведување. Но, ГРЕКО не се согласува со тоа едно исто лице (вицепремиерот) да биде надлежно и за санкционирање и за советување. ГРЕКО препорачува тие две функции да се разграничат, за да не може доверливите работи, избраните и именувани лица кои ги споделиле со оној со којшто се советувале, тој да ги искористи за нивно казнување – вели премиерот Заев за Слободен печат.

Тој вели дека Владата де факто направи поделба на овие две активности

-Љупчо Николовски е надлежен за иницирање на постапки за казнување/санкционирање, а Иван Тодоровски е лице за интегритет надлежно за држење обуки и давање совети – ГРЕКО бара тоа да се направи и де јуре, со измена на Етичкиот кодекс во тој дел – нагласува Заев.