Заев не ги прифати оставките на Филипче и Хасани
Премиерот Зоран Заев попладнево соопшти дека не ги прифатил оставките на министерот за здравство Венко Филипче и заменик-министерот Илир Хасани, кои тие ги понудија по пожарот во тетовската ковид болница, во кој загинаа 14 луѓе.
„Внимателно ги прочитав наодите на истражителите за причините за несреќата во тетовската модуларна болница. Како што е јавно соопштено, со стручните наоди на вештачење е утврдено дека пожарот настанал како последица од електрична куса врска во приклучен кабел. Врз основа на овие и претходно добиените информации, сакам да ја известам јавноста, нема причини да се лоцира политичка или менаџерска одговорност кај министерот Филипче и заменик министерот за здравство Хасани“, рече Заев.
Тој во неколку наврати претходно изјави дека ќе почека да заврши истрагата за да донесе одлука дали ќе ја прифати оставката на Филипче.
Ваквата одлука доаѓа откако Јавното обвинителство на Република Македонија денеска соопшти дека причината за пожарот бил спој во прегреан кабел од дефибрилатор.
Од ЈОРСМ истовремено посочија дека вештачењето утврдило и дека прегревањето на кабелот предизвикало палење во приклучната кутија од продолжените кабел на кој бил приклучен дефибрилаторот, полнач за мобилен телефон и уште еден апарат.