Заев: Ќе смениме повеќе од тројца министри, нема причина за моја оставка (ВИДЕО)
Претседателот на СДСМ, Зоран Заев по завршувањето на седницата на ЦО на СДСМ рече дека ветеното го исполниле.
– Целиот фокус ќе биде на подобрување на животот на граѓаните. Тргнавме од своите редови за подобрување, народот тоа ќе го цени. Пораката ја примивме и сите сили ќе ги насочиме кон подобрување на животот на граѓаните. Следуваат промени во извршната власт – рече Заев.
Тој најави дека ќе бидат сменети повеќе од тројца министри, но не сакаше да ја открие точната бројка ниту имињата.
– Повеќе министри ќе бидат разрешени, бројката не ја кажувам. Досега се сменети 6 министри, јас сум вкупно до бројката од една третина од Владата. Ќе има повеќе од тројца министри – рече Заев.
Тој, исто така, не сакаше да открие кој ќе дојде на местото на министерот за земјоделство, шумарство и водостопанство, Љупчо Николовски, кој денеска е назначен за генерален секретар на СДСМ, на местото на Александар Кирацовски.
– Имам во глава решение. Штом ќе ја донесам одлуката ќе ја соопштам – рече Заев.
Тој најави дека во периодот што следува ќе има промени освен на министри и на заменици министри и директори.
– Секаде каде што нема резултат односно се покажала ароганција, немало успешност, немало демократски капацитет, ќе има промени. Голем фокус ќе има на локалната самоуправа таму има слабости и кај градоначалници и кај локални прептријатија, мора да има промена оти ветивме живот за сите и тоа мора да го исполниме – рече Заев.
Премиерот кажа дека ќе станува збор за нови кадри, а не за ротација.
На новинарско прашање дали и тој ќе даде оставка, Заев рече дека не гледа причина за тоа.
