Заев: Бројките не се кријат, транспарентен е процесот од самиот почеток со епидемијата
Бројките не се кријат, транспарентен е процесот од самиот почеток со епидемијата до денеска, јас верувам, дека само така е исправно, рече Зоран Заев претседател на владејачката партија СДСМ, во вечерашното гостување на ТВ 21.
-Останува сите максимално да се придржуваме до мерките, носење на маска, дезинфекција редовна, држење на растојание до два метра, секако хигиената е многу важна. Таму каде се применуваат мерките, бројките се многу мали- рече Заев.
За зголемениот број на новозаразени лица со ковид-19, лидерот на СДСМ Зоран Заев, вели дека не се проблем само ифтарските вечери.
-Групното собирање е проблем, не би рекол дека се само ифтарските вечери или празникот Бајрам, во Струга имаше литија. Прво како луѓе ние сме социјални индивидуи, сакаме да се гушнеме, да дружиме, да се поздравиме, оваа работа не бива, мора да научиме да бидеме принципиелни, штитејќи се себе, ги штитиме и другите- рече Заев.