Програмата не е наменета за комунални работи, туку за директна поддршка на ранливите категории граѓани, вклучувајќи стари лица, лица со попреченост, како и деца од социјално загрозени семејства. Предвидените услуги опфаќаат дневна грижа, помош во домашни услови, поддршка за независно живеење, како и образовни и лични асистенти за деца.

Јавниот повик трае до 8 август 2025 година и е наменет за општините и за Градот Скопје. Невработените кои ќе бидат вклучени ќе добиваат бруто надоместок од 28.000 денари месечно во период од 18 месеци, со тоа што првите шест месеци ќе бидат финансирани од државата, а останатите од локалната самоуправа.

Програмата „Општинско-корисна работа“ е дел од севкупниот пристап за намалување на невработеноста, во кој се вклучени и други мерки, како што се практиканство – платена пракса до 3 месеци за млади лица со месечен надомест од 12.000 денари и обука кај познат работодавач со обврска на работодавачите да вработат најмалку 50% од учесниците.