Врховниот суд на САД ги отфрли и последните тужби од Трамп за наводна изборна измама
Врховниот суд на САД денеска ги отфрли последните три тужби поднесени од поранешниот претседател Доналд Трамп за оспорување на неговиот изборен пораз, со што се стави крај на неговиот судски обид за задржување на власта.
Судот без коментар ја одби жалбата на Трамп, кој оспори илјадници гласачки ливчиња во Висконсин, каде загуби од демократот Џо Бајден со повеќе од 20.000 гласа. Бајден стана претседател на 20 јануари.
Ова беше последниот од трите случаи поднесени во Врховниот суд на крајот на претседателствувањето на Трамп. Судот на 22 февруари ги отфрли другите две – за Висконсин и едно поврзано со гласањето во Пенсилванија, друга клучна држава каде Трамп беше поразен.
Веќе беше јасно дека Врховниот суд, во кој има тројца судии назначени од Трамп, нема намера да се меша во случаите поднесени од неговите сојузници.
Инаку, Судот денеска отфрли уште една тужба поврзана со изборите, поднесена од сојузникот на Трамп, Лин Вуд, кој побара од судиите да интервенираат и во изборите за Сенатот во Џорџија. На тие избори победија демократите, што им овозможи да ја имаат контролата врз Сенатот на САД.