Партијата ВМРО-Народна на Љубчо Георгиевски предлага Владата да направи светска кампања и да ги повика бизнисите да се префрлат во Македонија затоа што насекаде во светот било топло во јули, а во Македонија свежо.

– Со оглед на фактот, а поткрепен со заклучок на Климатската опсерваторија на ЕУ дека месеците јуни и јули оваа година биле најтоплите месеци сиве години откако се мерат овие параметри, а притоа знаеме дека токму месеците јуни и јули во С. Македонија беа едни од подождливите и посвежите месеци годинава, предлагаме Владата на Република Северна Македонија да отпочне со медиумска кампања за привлекување на странски инвестиции и инвеститори кои целосно би ги префрлиле своите бизниси на територијата на Република Северна Македонија – се вели во соопштението на партијата.

ВМРО-Народна партија, се додава, смета дека не треба да се пропушти ваквата можност за искористувањето на потенцијалот во поглед на климатските промени и за нејзино препознавање како идеална држава за инвестирање во одржливи бизниси, но и како второ живеалиште за многу граѓани на Северна Европа кои би ја препознавале Северна Македонија како држава со идеални климатски услови за бегство од горештини.

– Очигледно е дека со климатските промени Северна Македонија добива идеална климатска состојба па дури и подобра од онаа што ја памтиме во изминатите сто години со очигледни помеки зими и посвежи лета – сметат од партијата на Георгиевски.