Британските власти би можеле да забранат продажба на автомобили со мотори на фосилни горива во 2030 година, пет години порано во однос на првичниот план, пренесуваат „Фајненшл тајмс” и „Би-Би-Си“.

Продажбата на хибриди би била дозволена до 2035 година, но возилата со „чист” бензински и дизел мотор може брзо да исчезнат од продажните салони.

Забрзувањето на плановите, наводно, има врска со намерата да се зголеми продажбата на електрични автомобили со цел Велика Британија да се доближи до целите за климатските промени. Владата е подготвена да потроши 500 милиони фунти за изградба на инфраструктура што е потребна за полнење на електричните автомобили.

Се очекува Џонсон да го објави планот во наредните денови. Локалните медиуми коментираат дека производителите на автомобили веројатно нема да бидат задоволни од одлуката, што може да влијае на британскиот пазар.