ВМРО-ДПМНЕ ќе се консултира со јавноста, па ќе оди на референдум за преговарачката рамка
Извршниот комитет на ВМРО-ДПМНЕ на вечерашната седница едногласно и во целост ја прифати иницијативата за референдум и народно изјаснување во однос на преговарачката рамка за ЕУ, односно „штетните делови кои опфаќаат целосна асимилација, промена на историјата и бугаризација“, изјави вечерва генералниот секретар на ВМРО-ДПМНЕ Ѓорѓија Сајкоски пред централниот партиски штаб.
Во перидот што следи, како што информира тој, партијата почнува процес на широка консултација со експертската и општествената јавност за природата, карактерот и формулацијата на референдумското изјаснување чија крајна цел, како што кажа, е „народно спротивставување на идентитетското обезличување”.
Сајкоски посочи дека најпрво ќе направат широка консултација со општестевните чинители, па потоа ќе го водат процесот.
Седницата на ИК на ВМРО-ДПМНЕ сѐ уште трае, а на неа се разговарало за актуелни теми, како што е политичката состојба, со посебен осврт кон актуелното прашање врзано со преговарачката рамка и спорот со Бугарија.
„На површина излегоа сите лаги на Владата. Ветија и излажаа дека преговорите започнуваат веднаш, а преговорите започнаа само за Албанија“, рече Сајкоски, додавајќи дека се уште останува ветувањето на пратениците на ВМРО-ДПМНЕ дека се против уставни промени.