По вчерашната средба на премиерот Зоран Заев и лидерите на Алијансата и Алтернатива Зијадин Села и Африм Гаши за Законот за државјанство, ВМРО-ДПМНЕ денеска ги повлече амандманите. Според нив, на лицемерните игри и политиканството на Заев и СДСМ на сметка на граѓаните и стопанството, им нема крај. Координаторот на пратеничката група на ВМРО-ДПМНЕ, Никола Мицевски, ги повика Алијанса за Албанците и Алетрнатива веднаш да ги повлечат амандманите поднесени за законите од петтиот сет антикризни мерки.

– Свесни за недостигот на искрена желба за брзо решение, но и за критичниот момент во којшто се наоѓаат Македонија, граѓаните и стопанството, ќе ги повлечеме сите амандмани на Законот за државјанство се со цел конечно да се изгласа петтиот пакет на мерки за помош на граѓаните и стопанството, рече Мицевски.

Според него, во време кога над 55 илјади граѓани се останати без работа и едвај врзуваат крај со крај, кога македонската економија е на колена и илјадници компании се затворија, власта покажува неодговорност и кон граѓаните и кон стопанството.

-Бидејќи Владата до предлагачот достави негативно мислење, а со недели Зоран Заев и други официјални лица на СДСМ даваат изјави за неприфаќање на текстот на законот кој е во процедура, ги повикуваме истиот веднаш да го стават на комисија, бидејќи нема деловнички пречки односно нема амандмани, да ја продолжат пленарната седница и да се гласа за овој закон. Истовремено, ја повикуваме коалицијата Алтернатива/Алијансата за Албанците да ги повлече амандманите од петтиот пакет на мерки, за да можат компаниите и граѓаните да ги добијат и онака недоволните и задоцнети средства како помош за справување со последиците од КОВИД пандемијата, вели Мицевски.