Висок руски офицер, генерал-потполковник Владимир Алексеев, е итно префрлен во болница откако беше застрелан денеска во Москва, соопштија официјални лица, пренесува Ројтерс.

Алексеев е заменик-началник на Главната дирекција на Генералштабот при Министерството за одбрана. Кога шефот на платеници Евгениј Пригожин организираше краткотраен бунт во јуни 2023 година, Алексеев беше еден од највисоките функционери кои беа испратени да преговараат со него.

Канцеларијата на московското обвинителство соопшти дека Алексеев бил застрелан неколку пати во станбена зграда во северозападна Москва од непознат напаѓач кој избегал од местото на настанот.

Неколку високи руски офицери се убиени од почетокот на војната во Украина, а Москва го обвинува Киев за нападите. Во некои случаи, украинското воено разузнавање ја презеде одговорноста.

Последниот убиен офицер беше началникот на директоратот за обука на армијата на Генералштабот, генерал-потполковник Фанил Сарваров, кој беше убиен од бомба под неговиот автомобил на 22 декември.

ВИДЕО+ФОТО | Руски генерал е убиен во експлозија на автомобил бомба во Москва