Младинскиот културен центар ја најави светската премиера на филмот „Ефтеркланг: Македониум бенд”, во режија на Андреас Јонсен на еден од најголемите светски фестивали за документарен филм „CPH:DOX” на 23 март 2024 година во Копенхаген, Данска. По тој повод во утринската емисија „Слободен печат“ гостуваше музичкиот уредник на МКЦ, Владица Младеновски – Грга.

– Ја имаме таа чест нашиот филм што го правевме, го презентираме на светска премиера на престижниот фестивал „Копенхаген Докс“ во сабота на 23 март и тоа не со една, туку со две изведби, значи со две прикажувања и со два концерти. Во Копенхаген не одиме само ние и филмот, туку одат и 30 члена македонска експедиција, односно целиот бенд и дел од екипата, која учествуваше во снимањето на филмот – изјави Младеновски.

„Ефтеркланг“ се дански бенд кој има настапувано во МКЦ неколкупати. За време на нивното последно гостување за време на коронавирусот, се родила идејата за еден поинаков и поинтересен проект.

– Дојдоа тројца музичари од Данска со нивна екипа, киноматографер и режисер во Македонија на седумдневна музичка резиденција. Тогаш објавивеме на социјални медиуми дека тие се тука и дека планираме да правиме бенд. Така се собраа 6 македонски музичари и 16 члена од Женскиот младинскиот хор при МКЦ. Од 23 до 28 април минатата година работеа на таа музичка креација и на 30 април отидовме со автобус во Крушево и таму го свиревме концертот пред Македониумот. Сето тоа се снимаше од страна на дански кинематографер и режисерот Андреас Јонсен и од тоа направивме документарец, кој сега ќе ја доживее светската премиера – вели Младеновски.

Повеќе од разговорот со Владица Младеновски – Грга, можете да погледнете на следниот линк: