Жизел Пелико (73) ја изрази својата длабока емоција и благодарност кон кралицата Камила за време на обемното интервју што го даде за телевизиската програма на Би-би-си Њузнајт и новинарката Викторија Дербишир во петокот.

Сопругата на британскиот монарх испрати писмо со поддршка до Жизел Пелико во кое ја пофали за „извонредното достоинство и храброст“ што ја покажа за време на повеќемесечното судење на нејзините 51 силувачи, вклучувајќи го и нејзиниот поранешен сопруг, Доминик Пелико.

Доминик Пелико (73) ја дрогирал и силувал својата несвесна сопруга 10 години, а истовремено „регрутирал“ непознати мажи од онлајн платформа за свингери за да ја силуваат несвесната Жизел. Тој дури ги водел и силувачите на Жизел, а во исто време ги снимал силувањата на неговата поранешна сопруга. По завршувањето на високопрофилното судење кое ја шокираше Франција и пошироко, судот му изрече казна затвор од 20 години на главниот обвинет – максималната казна предвидена со францускиот кривичен закон за кривичното дело силување – додека соучесниците на Пелико беа прогласени за виновни, на кои судот им изрече затворски казни од три до 15 години.

„Судењето на векот во Франција“, како што го опишаа неколку француски медиуми, траеше речиси четири месеци. Започна во кривичниот суд во Авињон во септември 2024 година и заврши во декември истата година.

Жизел Пелико одби судењето да се одржи зад затворени врати, иако законот ѝ го даваше соодветното право, и избра јавно судење за, како што постојано изјавуваше, „срамот да ја смени страната“ и жртвата да не биде засрамена, како што обично се случува, туку сторителот. Храбрата одлука на 73-годишната Французинка ја направи глобален симбол против сексуалното насилство, а во исто време историското судење го истакна и постојано растечкиот феномен на силувања со хемиско поднесување (терминот се користи за жртви кои биле дрогирани, а потоа силувани).

Во интервјуто што го даде за Би-би-си, Жизел Пелико изјави за писмото за поддршка од кралицата Камила:

„За мене беше чест да го добијам ова писмо, воопшто не го очекував. Бев шокирана што кралицата ми го испрати ова писмо. Иако моите зборови го допреа целиот свет, не очекував писмо од Англиската палата. Се чувствував трогната и почестена што таа знаеше што ми се случи. Ѝ сум благодарна.“

Сопругата на кралот Чарлс со години ги поддржува жртвите на семејно насилство и сексуален напад. Пред една година, таа самата го отвори „Центарот за упатување за сексуален напад“ во Девон за да ги заштити овие жртви.

Во истото интервју, Жизел Пелико, меѓу другото, изјави дека е силна, но не пропушти да нагласи дека за неа е незамисливо човекот со кого го делела животот да ги извршил овие злосторства.

„Се чувствував скршена од ужасот, но не се чувствувам лута“, рече Жизел, која од минатиот април живее со својот нов партнер Жан-Луп, пензиониран стјуард на Ер Франс, како што откри Париз Меч.

Во вторник, 17 февруари, се очекува да излезе книгата „Химна за животот“, напишана од Жизел Пелико во соработка со француската новинарка и авторка Џудит Перињон. Книгата ќе биде објавена на 20 јазици, а самата Жизел изјави за пораката што сака да ја испрати преку нејзината книга:

„Преку оваа книга, се надевам дека ќе пренесам порака за сила и храброст до сите оние кои се соочуваат со тешки искушенија. Нека никогаш не се засрамат. И со текот на времето, нека научат повторно да уживаат во животот и да најдат мир.“

Жизел Пелико објави мемоари за судењето за силување што ја потресе Франција