Група Албанци создадоа вистинска „индустрија“ на фалсификувани тестови за вирусот корона, кои граѓаните масовно ги купуваа со цел да ја преминат границата со Грција, пренесуваат албанските медиуми.

Лажните ПЦР тестови беа откриени од медиумските мрежи Топ Чанел и Стар од Албанија, во кои се наведува дека групата фалсификатори работи првенствено на северот на Албанија.

Албанските власти пронајдоа многу фалсификувани тестови и тоа беше причината поради која Грција од денес го затвори граничниот премин Кристалопиги.

Патниците од Албанија сега ќе мора да поминат преку граничниот премин Какавија, каде ќе бидат подложени на брз тест, со задолжително покажување на негативен тест за ПЦР, не постар од 72 часа.

Стар објави како изгледа лажниот ПЦР тест. Разликите се забележуваат пред сè во логото на дијагностичкиот центар каде што е направен тестот, но и во потписот и печатот на докторот кој ниту бил виновен, ниту бил должен да стане жртва на фалсификување, пренесе телевизијата.

Наводно, многу од оние кои ја преминале грчката граница со лажни тестови веќе знаеле дека се заразени со вирусот корона и отишле во Грција пред сè на лекување затоа што не му веруваат на албанскиот здравствен систем.

Телевизијата го објави и случајот на 20-годишна жена која завчера со лажен тест се обиде да го премине преминот Какавија, но беше забележана по што избега. Досега се уапсени неколку Албанци.