ВИДЕО: Поранешен политичар кој сакаше да легализира детска порнографија обвинет за киднапирање на малолетно девојче во САД
Нејтан Даниел Ларсон, од американската сојузна држава Вирџинија е обвинет за киднапирање на 12-годишно девојче, јави Си-Ен-Ен, додавајќи дека 40-годишниот педофил во моментов се наоѓа во затвор во Денвер
Шерифот од округот Фресно изјави дека осомничениот управувал со сајт што поттикнува силување деца и објавување на фотографии и снимки со таква содржина.
Ларсон уште во октомври преку социјалните мрежи се запознал со 12-годишното девојче, кое живее во Фресно, и во текот на следните два месеца преку манипулации ја убедил да му испрати свои разголени фотографии.
Минатата недела тој долетал во Фресно и ја убедил девојката да се прикраде од нејзиниот дом во 2 часот по полноќ, а потоа повикал такси за да стигне до аеродромот.
Ларсон на девојчето му ставил перика и му кажал да се однесува како да е глувонема, за да не зборува со никого.
Полицијата истиот ден објавила дека девојчето е исчезнато, а кога детективите дознале дека киднаперот и девојчето се качиле во авион за Вашингтон, со трансфер во Денвер, исконтактирале со тамошните власти и побарале да го проверат Ларсон.
Полицијата во Денвер го уапсила киднаперот, а агентите на ФБИ го спасиле девојчето, кое не било повредено.
Ларсон е поранешен политичар кој се кандидирал за јавна функција во Вирџинија.
Тој својата политичка платформа ја опишал како „антифеминистичка“, со ветувања за легализирање на детска порнографија и полигамијата, укинување на државниот оддел за заштитни услуги на децата и обесхрабрување на жените да одат на колеџ, пренесуваат американските медиуми.
Ларсон исто така сакаше да го легализира бракот од инцест и да го укине 19-тиот амандман со кој на жените им се дава право на глас.
Во неговиот политички манифест од 2018 година тој рече: „Треба да се префрлиме на систем што ги класифицира жените како имот, првично на нивните татковци, а подоцна и на нивните сопрузи“, објави ХафПост. Покрај тоа, Ларсон се идентификува и како бел супремацист, ветувајќи дека ќе ја „врати добронамерната надмоќ на белите“ и го нарече Адолф Хитлер „јунак на белите супремацисти“.