Само неколку секунди и неколку чекори до можна трагедија – така може да се опише инцидентот што се случил на пешачка патека во Кањон Матка, кога огромна карпа ненадејно се одронила во момент кога во близина имало посетители.

Одронот се случил на 7 јануари годинава. Според видеоснимките што ги објави Курир, јасно се забележува моментот на паѓање на карпата, веднаш откако луѓето што се движеле по патеката се тргнале од тоа место.

Несреќата била избегната буквално за влакно. Посетителите, кои непосредно пред одронот се наоѓале на патеката, се оддалечиле само два до три метри, по што продолжиле да го фотографираат кањонот, без да насетуваат дека за миг ќе се случи опасниот одрон.

За среќа, во инцидентот нема повредени, но настанот повторно го актуелизира прашањето за безбедноста на пешачките патеки во Кањон Матка, особено во зимскиот период, кога ризикот од одрони е значително поголем.