ВИДЕО | Мартин Богатиноски: Поради суетата на владиците и натаму имаме две цркви во Македонија
Пред пола година МПЦ и СПЦ си пружија рака и прогласија екуменско единство. Гледано лаички и од страна, сите спорови што Скопје и Белград некогаш ги имале сега се минато. Тоа е веројатно и така, но во Скопје, односно во Македонија, се чини како спорот сè уште да не е решен. Односно статусот на ПОА и натаму е канонски, иако МПЦ ОА во меѓувреме се здоби со томос за афтокефалност, што е состојба неприфатлива за православието, тврди Мартин Богатиноски, кој утрово беше гостин во програмата на Утрински печат.
– Постои Православната охридска архиескопија ПОА на архиескопот Јован и МПЦ која беше во раскол, а сега веќе не е во раскол, а пак ПОА беше автономна црква којашто беше во единство со останатите цркви. Сега двете цркви се практично признати и таа состојба е недозволива. Требаше многу брзо да се интегрираат двете цркви, но еве и по пола година немаме договор – вели новинарот на Плусинфо.
Богатиноски важи за еден од најупатените новинари во Македонија, кога се во прашање црковните прашања, а за актуелната ситуација во која двете цркви не можат да се договарат тој смета дека главен проблем се суетите на владиците од двете страни.
Тој говореше и за дискриминацијата со која верниците, но и свештениците на ПОА се соочувале во изминатите години.