Екипите на Лос Анџелес Лејкерс и Денвер Нагетс поведоа во своите серии од првото коло на плејофот во Западната конференција, откако забележаа триумфи над Хјустон Рокетс, односно Минесота Тимбервулвс.

Лејкерси славеа со 107-98 против Рокетс, во натпревар во кој блесна Лук Кенард со рекордни за него 27 поени. Леброн Џејмс одигра одлична партија со 19 поени и 13 асистенции, додека Деандре Ејтон додаде 19 поени и 11 скока. Тимот од Лос Анџелес настапи ослабен без своите први ѕвезди Дончиќ и Остин Ривс, но знаеше како да го искористи отсуството на Кевин Дурант кај противникот.

Во натпреварот кој се играше претходно, Денвер ја совлада Минесота со 116-105, иако гостите подобро го отворија мечот. Клучна беше третата четвртина, кога Џамал Мареј беше незапирлив и го предводеше пресвртот. Јокиќ запиша трипл-дабл од 25 поени, 13 скока и 11 асистенции, додека Арон Гордон придонесе со 17 поени. Кај Минесота, Ентони Едвардс постигна 20 поени, а Руди Гобер додаде 17.