Кошаркарите на Лос Анџелес лејкерс ги победија Хјустон рокетс со 101:94 на домашен терен, поведувајќи со 2:0 во првото коло од плејофот на Западната конференција во НБА лигата.

Иако ослабени поради отсуството на Лука Дончиќ и Остин Ривс, Лејкерси, предводени од 41-годишниот Леброн Џејмс, успеаја да ги надиграат Рокетс, кои се на петтото место. Џејмс го заврши натпреварот со 28 поени, осум скока и седум асистенции, уште еднаш потврдувајќи ја својата врвна форма.

На Џејмс му даде голема поддршка Маркус Смарт, кој постигна 25 поени и седум асистенции, додека Лук Кенард додаде 23 поени.

За Хјустон, Алперен Шенгун забележа дабл-дабл учинок од 20 поени и 11 скока. Џабари Смит Џуниор постигна 18 поени, а Амен Томпсон 16 поени.

Враќањето на Кевин Дурант исто така не им помогна на гостите. Иако го заврши натпреварот со 23 поени, Дурант постигна само три поени во второто полувреме. Рокетс го завршија натпреварот со скромни 40,4 проценти шут од игра, погодувајќи само седум тројки.