Репрезентативците на Камерун се пласираа во четвртфиналето на Африканскиот куп на нации откако ја совладаа селекцијата на Коморските Острови со 2:1.

Стрелци на головите за Камерун беа Токо Екамби во 29 и Винсент Абубакар во 70 минута од средбата. Единствениот погодок за Коморите го реализираше Јусуф М`Чангама во 81 минута на дуелот во Јаунден.

Коморските Острови уште од седмата минута играа со фудбалер помалку откако црвен картон доби Наџим Абду. Воедно на овој меч настапија без ниту еден голман, првата опција Салим Бен Боина не можеше да игра поради повреда на рамото, а резервните чувари на мрежата Мијад Усеини и Али Амада добија позитивни тестови на коронавирус. Улогата на голман ја доби левиот бек Шакер Алхадур.

За пласман во полуфиналето избраниците на селекторот Тони Консеисао ќе се соочат за Гамбија која со 1:0 ја елиминираше Гвинеја со голот на Муса Бароу, членот на Болоња, во 71 минута.

Веќе е познато дека во четвртфиналната фаза силите ќе ги одмерат селекциите на Буркина Фасо и Тунис.