„Чери Спорт” годинава по петти пат ќе го одржи „Чери куп Скопје“. Во разговор за „Утрински печат“, организаторот и директорот на „Чери Спорт“, Вилма Марковска раскажа за сите можности кои најмладите тениски таленти можат да ги стекнат со пријавување на ова натпреварување. Голем број млади македонски, но и странски таленти кои го сакаат тенисот, често се пријавуваат на овој турнир, а искуството, наградите и дружбата кои можат да ги стекнат се паметат за цел живот, раскажува Марковска.

„Чери куп“ е првиот и единствен спортско-едукативен хаб во регионот, кој ги обединува младите играчи, нивните родители, тренери и клубови во еден амбиент и низ годишна програма на активности и проекти го прави детскиот тенис поквалитетен, поорганизиран и побидлив. Секој играч има загарантирани пет натпревари, а на овој турнир се играат и натпревари во двојки, преку кои, како што вели Марковска, се развива и тимскиот дух кај младите.

Со 30 години во детскиот тенис, Марковска е активна и во Скопје и во Белград. Нејзина главна цел е да младите играчи да живеат една комплетно здрава и убава тениска приказна.

Таа вели дека иако Македонија бројот на млади кои одлучуваат да тренираат тенис е релативно голем, ретко кој од тие деца одлучува професионално да се натпреварува во овој спорт.

Нејзин најголем предизвик како тениски тренер е едно дете од така наречените градинки, да прерасне во натпреварувач. Според неа, тоа е комплицирана задача, бидејќи бара соработка од целото семејство на детето, но и целосна промена на начинот на кој тој млад човек ќе живее.

Младите треба да знаат дека патот до професионалниот тенис е тежок, но за среќа за овој спорт, како што вели првиот човек на „Чери спорт“, младите во Македонија обожаваат да играат тенис. Марковска ја радува фактот што многу млади и рекреативно играат тенис, бидејќи овој спорт нема само здравствени придобивки кај нив, туку и психички.

Таа вели дека родителите треба да им помогнат на младите кои ќе се одлучат професионално да играат тенис, бидејќи како ќе се развиваат тие, така ќе се развива и спортот. Нејзина цел е да се натераат младите да се заљубат во овој спорт.

Младите сега имаат неколку примери на тенисери кои бележат добри успеси на европско и светско ниво, како Калин Ивановски, Лина Ѓорческа, Обрад Марковски и други. Но, според неа овие тенисери треба да се донесат во Македонија и да работат со младите тенисери, бидејќи така ќе бидат уште подобар пример за нив.