ВИДЕО ИНТЕРВЈУ | Методи Хаџи Јанев: Членство во НАТО нуди предности за ремонт на хеликоптерите Ми-8Т
Испраќањето на македонските два хеликоптери Ми-8Т коишто се од руско потекло на ремонт и сервисирање во Чешка од страна на властите е одговорен чин. Одржувањето на овие летала и сериозната техничка опрема не смее да трпи импровизации, па оттаму е за поздравување оваа одлука со која впрочем е и бенефит од нашето ченството во НАТО, истакна универзитетскиот професор Методи Хаџи Јанев при гостувањето во емисијата „Утрински печат“.
– Овие летала имаат век на траење и часови коишто мора да се почитуваат. Но она што е најважно и мора да се нагласи а тоа е дека ова всушност преставува и предноста од нашето членство во НАТО а тоа е дека во услови кога Русија ги пресече каналите за лиценцирано одржување на сите борбени системи и техники од советско потекло поради случувањата во Украина, друга земја тоа да го обави професионално и соодветно – истакна Хаџи Јанев и додаде дека многу е важно да во вакви услови имаме држави кои ни излегуваат во пресрет на нашите потреби.
Професорот Хаџи Јанев во емисијата ги искоментира и последните случувања во соседна Србија и чекорот на српската жандармерија со кој се спречи десничари да влезат во зградата на претседателството на Србија.
– Случувањата во соседна Србија имаат неколку објаснувања. Првата е дека сето ова е сценарио на српскиот претседател Александар Вучиќ, особено на оние медиуми кои се наклонети кон косовската страна во проблемот но и обвинувањата на опозицијата дека сето ова е испланирано сценарио. И второто, според мене е дека овие случувања се резултат на раздорот во владеачката коалиција на претседателот Вучиќ во однос на прашањето каде Србија треба да се ориентира дали кон Западот или Истокот односно ЕУ и САД или сојузот со Русија. Сето ова говори дека времето за театри и популизам на Александар Вучиќ одминува бидејќи тој е ставен во теснец – вели Хаџи Јанев и појасни дека српскиот претседател сепак засега успешно ја балансира политиката на Србија во глобалните превирања.
Познавачот на состојбите во разговорот во студиото зборуваше и за наближувањето од годишнината од почетокот на руската инвазија во Украина, состојбите на боиштата како и за кои ќе бидат следните чекори на рускиот претседател Владимир Путин на светската геополитичка карта.
Повеќе од разговорто со Хаџи Јанев погледнете во видеото во продолжение…