Возач осомничен дека управувал возило под дејство на алкохол бил приведен од полицијата во американската сојузна држава Колорадо, откако за време на сообраќајна контрола признал дека во багажникот на автомобилот превезувал три деца, покажува снимка од телесна камера, објави „Дејли Мејл“.

Вознемирувачкиот настан е документиран на видео објавено од Полициската управа на Вестминстер, а се случил на 23 јануари годинава, за време на рутинска контрола.

Според полицијата, возилото било забележано како вози „неодговорно“ во близина на улиците City Center Dr и 93rd Ave во Вестминстер. При доближувањето до автомобилот, полицаецот почувствувал мирис на алкохол, но возачот тврдел дека не консумирал алкохол.

Иако првично се согласил да изврши доброволни теренски тестови за трезвеност, возачот набргу се предомислил. Потоа бил ставен во лисици, кога, според снимката, следело и неочекуваното признание.

„Значи имате три деца скриени во багажникот?“, го прашал полицаецот, а осомничениот го потврдил тоа.

Возачот, чие име не е објавено, бил уапсен под сомнение за возење под дејство на алкохол, неодговорно возење, непоседување важечко осигурување, како и по три точки за злоупотреба на деца.

На почетокот од видеото, полицаецот, кој се претставува како Кестер, го прашува возачот дали знае зошто е запрен.

„Затоа што се однесував како идиот?“, одговара возачот, чие лице е заматено.

„Да, и тоа сериозно, на паркингот. Среќа што не удривте некого“, му возвраќа полицаецот.

Следува прашање дали возачот пиел, при што полицаецот посочува дека од возилото се чувствува мирис на алкохол.

„Не, господине“, одговара возачот.

Во следниот дел од снимката, полицаецот го прашува дали возачот е подготвен да изврши доброволно алко-тестирање, на што тој одговара потврдно. Малку подоцна, видеото прескокнува на момент кога возачот стои пред автомобилот.

„Не сакате да ги продолжите тестовите? Во ред, ставете ги рацете зад грб“, му вели полицаецот.

По уште еден прекин во снимката, полицаецот повторно го прашува возачот дали во багажникот има три деца, по што друг полицаец го отвора багажникот и ги затекнува децата внатре.

„Што правите вие?“, ги прашува полицаецот.

Возачот потоа е одведен, а полицаецот му вели:

„Не мислевте дека ќе беше добра идеја да кажете нешто порано?“

Според полицијата, во возилото биле пронајдени и неколку шишиња со алкохол.

По апсењето, возачот бил пренесен во затворот на округот Адамс. Дополнителни информации за случајот не се објавени.

По интервенцијата, била повикана Службата за заштита на деца, а децата биле предадени на членови на семејството, соопшти полицијата.

Засега не е познато дали децата се во роднинска врска со возачот, ниту поради која причина биле со него.

Од „Дејли мејл“ соопштија дека стапиле во контакт со Полициската управа на Вестминстер за дополнителен коментар.