Репрезентативците на Франција го совладаа Казахстан со 8:0 и така го обезбедија пласманот на Светското првенство во Катар следната година. Учество на Мундијалот обезбеди и селекцијата на Белгија која ја оправда фаворитската улога против Естонија (3:1).

Актуелните светски шампиони, „триколорите“ во Париз водеа со 3:0 после првото полувреме со хет-трикот на Мбапе кој стрелаше во шестата, 12 и 32 минута од средбата на „Паркот на принцовите“.

Во вториот дел двоен стрелец беше Бензема, во гол серијата се придружија уште Рабио и Гризман, а во 87 минута Мбапе имаше уште еден погодок за поставување на конечниот епилог.

Во групата „Д“ претходно Финците беа подобри од Босанците со 1:3 и моментно се најблиску до баражот. Води Франција со 15 бодови, пред Финска која има 11, Украина е третопласирана со девет, четврта БиХ со седум, а последен е Казахстан (три). на 16 ноември Финска е домаќин на Франција, а Босанците ќе ја пречекаат Украина.

Белгија исто така се промовираше во нов учесник на Мундијалот по триумфот над Естонија. Во истата група Велс славеше над Белорусија со 5:1. Белгијците водат со 19 бодови, пред Велс со 14, Чешка е третопласирана со 11, на последните две позиции се Естонците (четири) и Белорусите (три).

На Велшаните ќе им биде доволен и бод во последното коло дома против Белгијците, а Чесите кои се фаворити против Естонците ќе чекаат „услуга“ од играчите на Роберто Мартинез.

ВИДЕО: Холандија може да остане без пласман на Светското првенство