Поранешниот министер за транспорт и врски Љупчо Балковски, член на ВМРО-НП во дебата со пратеникот Мартин Костовски од СДСМ во емисијата „Утрински печат“ потенцирајќи ја важноста од градењето на патните коридори 8 и 10-Д и осврна и на фактот што тоа не се потполно автопатски решенија.

-Од исклучителна важност е доаѓањето на еден градежен гигант како конзорциумот „Бехтел и Енка“ не само во градежништвото туку и пошироко. Исто така е важно што Владата што ја има донесено стратегијата во доменот на патната инфраструктура како и транспортот и сообраќајот за да ја реализира. Нашата забелешка е во процесот на донесување и во процесот на градењето на автопатите во Македонија. Исто така сметаме дека кога веќе сме донеле таков градежен гигант требаше да одиме со комплетни Коридори 8 и 10 Д што значи коридорите сега не се потполно автопатски решенија туку само делумно иако коридорот 8 на пример почнува од Крива Паланка, а завршува до Ќафасан. Сега имаме автопатско решение од Тетово до Ќафасан и од Прилеп до Битола, а тоа значи од Куманово до Деве Баир ќе имаме тесно грло, рече Балковски.

Пратеникот Костовски ги нагласи придобивките од овој проект на Владата кој ќе чини околу 1,3 милијарди евра и овозможува патно поврзување со пристаништата Драч и Бургас.

-На овој проект се чекаше премногу долго и не сме имале можност да се радуваме на еден таков проект што е автопатско поврзување на исток и запад и север и југ со децении. За жал поради изолационите политики на претходната Влада или немањето слух за потребите на граѓаните и бизнис заедницата, Коридорот 8 беше само на лист хартија и политички памфлет. Оваа Влада смогна храброст во интерес на рамномерен регионален развој со голем ентузијазам да пристапи кон започнување на овој проект кој ќе овозможи нови 8 илјади работни места, пораст на БДП на годишно ниво од два проценти, потоа се отвораат можности за нови инвестиции во други стопански гранки. Досега го користевме само пристаништето во Солун, а сега и двете други пристаништа Бургас и Драч ќе бидат во функција на бизнисот, рече Костовски.

Целата дебата на Балковски и Костовски погледнете ја во видеото: