ВИДЕО: Црвена звезда со „минус“ од Хаифа, Бенфика поблиску до групите во ЛШ
Макаби Хаифа на домашен терен ја совлада Црвена звезда со 3:2 во првиот натпревар од плеј-офот за пласман во групите на Лигата на шампионите.
Во пресметка полна со пресврти, во првото полувреме најпрвин поведоа Израелците со голот на Пјерот во 18 минута.
Следуваа два погодоци на белградските „црвено-бели“ преку Пешиќ во 27 и интернационалецот од Габон Канга во 40 минута.
Во вториот дел следуваше нов пресврт, Макаби Хаифа најпрвин израмни во 51 минута кога стрелаше Пјерот за негов втор гол на натпреварот, а конечниот епилог го постави Чери во 61 минута.
Реваншот помеѓу Црвена звезда и Макаби Хаифа ќе се игра на 23 август на стадионот „Рајко Митиќ“ во Белград, Србија.
Се одиграа уште два меча во средата, Карабах дома ремизираше без голови со Плзен, а Бенфика славеше на гостувањето кај Динамо Киев со 0:2. Португалците триумфираа со головите на Жилберто во деветтата и Рамос во 37 минута.