Астон вила брзо се врати на победничките патеки откако во претходното коло беше поразена од Арсенал, совладувајќи го Нотингем форест со 3-1 во натпревар одигран викендов.

Тимот на Унаи Емери уште еднаш потврди дека оваа сезона сериозно конкурира и за највисоките позиции на табелата, доминирајќи на теренот од првата до последната минута.

Иако Вила имаше иницијатива во текот на целиот прв дел до гол дојде дури пред самиот одмор, кога Оли Воткинс прецизно погоди по асистенцијата на Роџерс.

Домашните не застанаа ниту по паузата, па веднаш на стартот од второто полувреме капитенот Џон Мекгин зголеми на 2-0. Нотингем форест накратко се врати во игра преку Гибс-Вајт, кој намали во 61. минута, но тоа се покажа како недоволно за вистински пресврт.

Конечните 3-1 ги постави повторно Мекгин во 73. минута, ставајќи точка на сите дилеми.

Со овој триумф Астон вила моментно се искачи пред Манчестер сити на табелата, иако „граѓаните“ допрва треба да го одиграат својот натпревар од 19. коло, во кој ги очекува дерби дуел со Челси.

Преземео од: Спорт.ком.мк