Манчестер Јунајтед и се реваншираше на Астон Вила за поразот од пред неколку дена во Премиер лигата и вечерва во Карабао Купот со комбиниран состав „црвените ѓаволи“ славеа со 4:2.

Двапати Јунајтед „бркаше“ негатива, но на крајот го продолжија натпреварувањето во следната фаза. Првите 45 минути поминаа без многу шанси и возбудувања, сите шест гола паднаа во второто полувреме.

Вила до водство стигна со голот на Оле Воткинс, меѓутоа само минута подоцна Марсијал по асистенцијата од Бруно Фернандеш погоди за 1:1. Продолжи Вила со офанзивната игра и после изедначувачкиот гол на Јунајтед, нов гол постигнаа во 61. минута. Трагичар беше Далот кој по ударот на Бејли ја испрати топката зад грбот на Дубравка.

Не се чекаше многу за ново изедначување, шест минути по автоголот на Далот, Рашфорд во соло акција погоди за 2:2. Бруно Фернандеш се погрижи Јунајтед првпат да дојде до предност, а конечните 4:2 ги постави Мектоминеј.