Видарсон: Знам дека Македонија има многу важен меч, но Исланд оди на победа
Македонската А репрезентација утре од 18.00 часот на Националната арена „Тодор Проески“ ќе ги одмери силите против Исланд во последниот натпревар од квалификациите за пласман на Светското првенство.
Нашата А селекција со триумф ќе го обезбеди второто место и мундијалскиот бараж, а Исланѓаните се без шанси откако ги откажавме после убедливата победа во Ереван.
Исланд ни направи „услуга“ откако не загуби во претходното коло против Романија во Букурешт играјќи без голови (0:0), а сега мотивиран доаѓа по добар резултат и во Скопје. Така барем најавува исландскиот селектор Артур Видарсон:
– Сакаме во добра атмосфера да ги завршиме овие квалификации. Како и на сите досегашни натпревари, и на утрешниот против Македонија одиме на победа. Среќни бевме после бодот освоен во Букурешт, иако се чувствуваше незадоволството кај моите играчи дека можеа да дојдеме и до триумф.
Повторно сакаме добро да се претставиме, важно е за нас да напредуваме. Одиме чекор по чекор, сакаме да постигнеме голови и се надевам дека тоа ќе го направиме в недела. Свесни сме дека противникот е силен и игра многу важен натпревар – вели Видарсон.