Велешката болница лани набави опрема вредна 130 илјади евра
Менаџерскиот тим на ЈЗУ Општа болница Велес со сопствени средства минатата година, во услови на пандемија, набави опрема вредна 130 илјади евра.
Набавени се апарат за анестезија со монитор, за деца и возрасни, два апарата аспиратори за сукција, дефибрилатор, оптика за лапарoскопија, кардиолошки сонди, гастроскоп и колоноскоп, осум концентратори за кислород, седум пациент монитори, апарати за физикална терапија со ултразвук, интерферентни струи и дијадинамиски струи.
– Потврдивме дека со вистинска организираност и труд секогаш се постигнуваaт успеси. Покрај пандемијата, кога болницата ги стави сите свои ресурси во служба на превенција и лекување на заболените од Ковид-19, покажавме значајни резултати, изјави портпаролот на велешката болница, д-р Елеонора Јованова.
Додаде дека бенефитот и задоволството од новата опрема ја чувствуваат вработените и пациентите.
– Со набавка на овие апарати значајно се подобри квалитетот на здравствените услуги кои ги нуди нашата болница, истакна д-р Јованова
Најави дека во претстојниот период продолжуваат со инвестиции во ЈЗУ Општа болница Велес и во подобрување на квалитетот и достапноста на здравствените услуги за граѓаните.
Покрај од поширокиот велешки регион, во кој се вклучени општините Велес,Градско и Чашка, во велешката болница се лекуваат и пациенти од градовите на Повардарието, како и од други градови.