Велешанецот Ѓело Ѓошев бил сурово убиен пред два дена кај местото Поројница, во близина на земјениот пат од Чашка кон селото Буслици. Двајца го намамиле во автомобил и му пукале во глава, откри истрагата на велешкото Обвинителството кое фати еден од убијците, а по другиот уште трага.

– Најпрво осомничениот го намамил и со својот автомобил го однел оштетениот на локацијата. Потоа заедно со другото лице пукале во него со огнено оружје, нанесувајќи му прострелна рана во черепот од која жртвата починала. Осомничениот претходно бил сторител на кривично дело разбојништво, а според дел од доказите кои веќе се обезбедени, по убиството во Чашка се обидел да ги прикрие трагите и со тоа да влијае на постапката – соопшти Обвинителството.

Јавниот обвинител за уапсениот бара притвор. Инаку полицијата претходно соопшти дека во полициското одделение во Чашка било пријавено дека е пронајдено мртво тело на маж. Жртвата имала 58 години, а истражните органи уште не го соопштуваат мотивот.