Капитенот на македонската репрезентација Горан Пандев и неговата Џенова освоија важни три бода по победата над Лече од 2:1 во рамките на 34. коло од Серија А.

Пандев беше во првиот тим на Џенова која со победата над директниот конкурент во битката за опстанок успеа да победи и му избега на Лече на четири бода.

Џенова одлично го започна натпреварот и веќе во седмата минута пред Санабриа поведе со 1:0. Во последната минута од првото полувреме Манкосу промаши пенал за Лече, но истиот фудбалер во 60. минута донесе израмнување. Сепак победата и трите бода и припаднаа на Џенова благодарение на автоголот на Габриел во 81.минута.

Во дуелот на македонските репрезентативци на крајот се радуваше Елиф Елмас откако неговиот Наполи со 2:1 го совлада Удинезе на Илија Несторовски. Несторовски беше стартер за Удинезе и го одигра целиот меч, а не му беше признат и погодок поради офсајд позиција, додека Елмас Елмас влезе во игра во 80.минута. Родриго де Пол донесе предност за Удинезе во 22.минута, а израмни Аркадиуш Милик девет минути подоцна. Победничкиот гол беше дело на Матео Политано во 95.минута од овој меч.

Резулати:
Парма – Сампдорија 2:3
Бреша – Спал 2:1
Фирентина – Торино 2:0
Џенова – Лече 2:1
Наполи – Удинезе 2:1