Елиса Гранато, која вчера примила вакцина против коронавирусот во рамки на клиничките испитувања на Оксфорд, не е мртва, како што се наведува на социјалните мрежи.

Би-Би-Си утринава преку Скајп разговарале со Елиса, по професија микробиолог, за која на социјалните мрежи кружат гласини дека е мртва.

Елиса за Би-Би-Си потврдила дека се чувствува добро, дека утринава дала примерок крв за испитување, како и дека денеска планира да одмори и да ужива во убавото време надвор. Научничката рекла дека се допишувала со членови на својата фамилија, за да ги извести дека гласините не се точни.

Професорот Ендрју Полард кој го предводи тимот за клиничко испитување на вакцини на Оксфорд изјавил дека вакви лажни вести можат негативно да влијаат на нивната способност да се борат против епидемијата и дека тоа нема да го дозволат.

Докторката Гранато била првата личност во Европа која примила вакцина против коронавирусот во рамки на клинички испитувања.

Сите објави кои на повеќе јазици пренесувале вест за наводната смрт на Елиса се отстранети од социјалните мрежи.