Семејна трагедија вечерва ги потресе жителите на Тетово – татко со ловечка пушка си го убил синот, објави ТВ21.

На местото на злосторството, во населбата Блок 70, вечерва пристигнала полицијата, која го пронашла оружјето со кое е извршен насилниот чин.

Според првичните информации кои ги објави телевизијата, таткото два дена не излегувал од станот и полицијата се сомнева дека убиството е извршено пред два дена. Осомничениот е однесен во болница поради неговата психичка состојба.

Околу случајот подоцна вечерта се огласи полицијата. Според СВР Тетово, околу 18:50 часот во својот дом во Тетово бил пронајден 39-годишниот С.Н., со прострелна рана во главата и без знаци на живот. С.Н. живеел со неговиот татко, кој бил пронајден во бессознание и од Итната медицинска помош бил пренесен во Ургентниот центар во тетовската Клиничка болница. Во просторијата каде бил пронајден С.Н., пронајдена е ловечка пушка, информираат од СВР Тетово. Од тетовската полиција додаваат дека во координација со јавен обвинител се преземаат мерки за расчистување на случајот.