Твитер трајно и го укина профилот на американската конгресменка поради ширење дезинформации за коронавирусот
Твитер го забрани личниот профил на републиканската членка на Претставничкиот дом на САД, Марџори Тајлер Грин поради повеќекратно прекршување на прописите на таа социјална мрежа во врска со ширењето на дезинформации за Ковид 19.
Во соопштението на компанијата се вели дека налогот на Грин е трајно суспендиран во рамките на системот Твитер лансиран во март, кој користи вештачка интелигенција за да идентификува извештаи за коронавирусот кои ги доведуваат во заблуда и им штетат на луѓето, пренесува АП.
Се прецизира дека за два или три прекршоци се воведува суспензија од 12 часа, за четири еднонеделни суспензии, додека пет или повеќе прекршоци може да доведат до трајно укинување на профилот.
Грин, преку конкурентската социјална мрежа „Телеграм“ ја нарече одлуката на Твитер како неамериканска и изјави дека нејзиниот профил бил суспендиран откако објавила статистика од Системот за известување за несакани ефекти од вакцината, владина база на податоци што вклучува и непотврдени информации.
„Твитер е непријател на САД и не може да ја поднесе вистината. Тоа е во ред, но ќе им покажам на САД дека не ни се потребни социјални мрежи како Твитер и дека е време да ги победиме нашите непријатели“, рече Грин.
Во јули, Твитер го суспендираше профилот на Грин на седум дена, по повикот на американскиот претседател Џо Бајден до сите социјални мрежи да санкционираат лажни објави за вакцината против Ковид, поради која умираат луѓе.
Пред таа суспензија, Грин напиша на Твитер дека ковидот „не е опасен за луѓето кои не се дебели и кои се помлади од 65 години“, а нејзиниот профил сега е укинат затоа што напишала дека е регистриран многу голем број смртни случаи кај лицата кои ја примиле вакцината.