Италијанскиот тенисер Фабио Фоњини за првпат во кариерата крена шампионски пехар на турнир од Мастерс серијата откако триумфираше во Монте Карло.

По големата победа во полуфиналето над големиот фаворит Рафаел Надал, Фоњини во два сета со 6:3,6:4 за еден час и 36 минути игра го совлада српскиот тенисер Душан Лајовиќ.

Италијанецот иако го загуби првиот сервис гем, веднаш ја консолидира играта и доминираше на теренот, поведе со 5:2 и на крајот првиот сет го реши во своја корист со 6:3.
Во вториот сет, Фоњини при 2:2 направи брејк и не дозволи изненадување до крајот за конечен триумф од 6:4 и прв трофеј од Мастерс турнирите.

Триумфот во Монте Карло на Фабио Фоњини ќе му донесе скок од шест позиции и од утре ќе биде 12. на АТП ранг листата, додека финалистот Лајовиќ, кој исто така за првпат играше во финале на турнир од Мастерс серијата, ќе биде 24. тенисер на ранг листата.