Трагедија на автопатот Тетово-Скопје: тројца загинати во судир на автомобил и автобус
Тројца луѓе ги загубија животите попладнево околу 16 часот на автопатот Тетово-Скопје, а според информациите од тетовската полиција, се судриле автомобил „Опел“ и автобус.
Препорачано
„Две лица, маж и жена, починаа на местото на настанот, додека една жена починала во Клиничката болница во Тетово, каде што исто така е однесено и повредено дете за да му се пружи лекарска помош“, се вели во првичната информација од СВР Тетово.
Јавен обвинител, противпожарни екипи и полиција се на местото на настанот и вршат увид.
Според првичните сознанија од Обвинителството, до несреќата дошло при контакт меѓу автомобил и автобус, при што автомобилот со кој патувале тројцата сега починати и повреденото дете излетал од патот.
„Се преземаат сите дејствија за испитување на причините и на околностите поради кои дошло до контакт меѓу возилата и до несреќата. Јавниот обвинител издаде наредба за обдукција на починатите, а за возачот на автобусот наредено е испитување на евентуално присуство на алкохол или други супстанции. Возилата се одземени за технички преглед на нивната исправност во моментот на сударот“, велат од ЈО.
ВИДЕО: Надзорна камера ја сними страотната несреќа кај Тетово – возачот на автомобилот нагло завртил
