Тони Надал  до пред две години му беше тренер на својот внук, а сега раководи со тениската академија на Рафаел Надал во Мајорка. Сепак, иако е надвор од актуелните тениски возбудувања, Тони ги следи настапите на најдобрите тенисери и упати серија критики за тоа каде оди модерниот тенис.

– Тенисот станува многу брз, морате да ја удирате топката порано и посилно. Поради тоа поинтересно ми е да гледам пинг понг. Публиката не се жали иако не гледа ништо, а исто така не внимаваат на деталите. Го обожувам стилот на Федерер, Надал, Ѓоковиќ и на Ришар Гаске, бидејќи тие трчаат, се бранат и напаѓаат, додека поголем дел од останатите тенисери само го удираат топчето и не се движат како што треба. Треба да се прекине со развојот на топчињата и на тениските подлоги – вели Тони Надал.

Поранешниот тренер на Рафаел Надал, смета дека новата генерација на тенисери не може да ја загрози големата тројка, Федерер, Надал и Ѓоковиќ.

– Борг, Мекинро и Конорс беа големи шампиони кои заедно освоија 26 гран слем титули. А сега погледнете ги Рожер, Рафа и Новак кои имаат дури 54 титули, тоа е повеќе од двојно. Поради тоа е сосема јасно зашто многумина ги сметаат токму нив за најдобри тенисери во историјата. Во секој случај сметам дека тројцата имаа среќа бидејќи генерацијата која дојде по нив е неспособна да ги предизвика – смета чичкото на Рафаел Надал.