Тројца луѓе украле куфери со повеќе од два милиони евра во готово на прометна улица во центарот на Токио, објавија денес полицијата и медиумите, што е редок инцидент во јапонската престолнина, позната по својата безбедност.

Напаѓачите употребиле солзавец за да ги грабнат куферите во кои се наоѓале парите околу 21:30 часот во четврток во близина на станицата Уено, популарна туристичка област, изјави за АФП портпарол на токиската полиција под услов да остане анонимен, пренесува Макао њуз.

Портпаролот одби да даде дополнителни детали, но локалните медиуми објавија дека жртвите биле група од пет кинески и јапонски државјани кои се обидувале да натоварат куфери со 2,3 милиони евра (420 милиони јени) во возило.

Според телевизијата Фуџи, жртвите им рекле на полицајците дека парите биле наменети за менувачници.

Во друг инцидент, маж кој носел околу еден милион евра (190 милиони јени) во готово бил нападнат со солзавец од група од тројца мажи синоќа на паркингот на аеродромот Токио-Ханеда, според јапонските медиуми.

Полицијата истражува можна поврзаност меѓу двата напада, според телевизиската мрежа TBS.