Тежок удар за Хрватите, сега и победа над Данска не им гарантира четвртфинале
Репрезентацијата на Хрватска вечерва го претрпе првиот пораз на Светското првенство во Египет и значајно ги намали шансите да се најде во четвртфиналето.
Избраниците на селекторот Лино Червар го одиграа еден од најлошите натпревари во последните неколку години, загубија од Аргентина со 23:19 (12:12).
За јужноамериканската селекција доминираа Пизаро и Симонет со по четири голови, а на спротивната страна за „коцкестите“ прв стрелец беше десното крило на Вардар 1961, Чупиќ со седум голови.
Хрватите сега ќе мора по потешкиот пат да бараат „билет“ за следната фаза, доколку Данците денеска ја оправдаат фаворитската улога против Јапонија, ќе мора да бркаат победа над актуелниот светски шампион во последното коло, но воедно ќе им треба триумф на Катар против Аргентина.
Веќе ги дознавме првите четвртфиналисти, од групата „1“ тие се селекциите на Унгарија и Шпанија. Црвената „фурија“ без проблеми славеше против Уругвај (38:23), додека Унгарците со 30:26 беа подобри од Полска.