Војната помеѓу УЕФА и ФИФА од едната и европската Суперлига од друга страна се префрли во Европскиот суд за правда каде ќе се решава еден од најголемите спорови во историјата на фудбалот.
Проектот Суперлига „живееше“ само 48 часа по што девет од вкупно 12 клубови основачи, се повлекоа од „лигата на богатите“ поради големиот притисок од навивачите, УЕФА, ФИФА и владите, но тое не значеше крај на проектот.

Реал Мадрид, Барселона и Јувентус не подлегнаа на притисоците и најавите за суспензии од страна на УЕФА и одлучија да одат до крај со Суперлигата. Според последните сознанија, случајот заврши пред Европскиот суд за правда во Луксембург, а трите фудбалски гиганти тврдат дека УЕФА и ФИФА го прекршиле правото на конкурентност кое важи во државите во Европската Унија и дека поради тоа мора да платат.

Очекувањата се дека постапката може да трае со месеци, но поради итноста на случајот, можно е истиот да биде решен до почетокот на новата фудбалска сезона во Лигата на шампионите.
Бидејќи Европскиот суд за правда е највисока инстанца во законодавството, одлуката која ќе ја донесе ќе биде обврзувачка за националните судови и може да направи пресврт кога станува збор за судбината на европскиот фудбал.