Бипин Џоши видел две гранати како се лизгале по цементниот под од просторијата без прозорци каде што се криел рамо до рамо со уште 16 студенти од Непал. Надвор, вооружени лица на Хамас ги ограбиле овоштарниците на кибуцот Алумим, убивајќи ги сите кои се појавиле пред нив. Непалците пристигнале во Израел само три недели претходно, за студиска програма за одгледување на градини со портокали и лимони. Првата плата требало да ја добијат за два дена, но по неочекуваниот напад тие некако се стуткале до ѕидот на кибуцот и се молеле да преживеат, пишува Волстрит Журнал.

Бипин скокнал, зел една бомба и ја фрлил на безбедно. Но, тој не успеал навреме да стигне до втората бомба. Таа експлодирала, оставајќи го со тешки повреди него и петмина негови пријатели.

Според сите извештаи, 23-годишниот студент по земјоделство тој ден станал херој. Тој ги засолнил своите колеги на безбедно во блиската кујна, а потоа се обидел да ги собере за да им помогне на жртвите од гранатата. Меѓутоа, пред да заминат, милитантите на Хамас се вратиле со засилување. Вооружените напаѓачи влегле низ вратата од кујната и ги грабнале Бипин и тројца тајландски фармери кои се криеле во близина. Оттогаш никој не слушнал за Бипин.

Приказната на Бипин Џоши е само мал дел од најкомплицираната заложничка криза во модерната историја. Според израелските податоци, милитантите сè уште држат 239 заложници земени за време на нападот на Хамас на 7 октомври. Меѓу овие затвореници во тунелите под Појасот Газа има и 10 Американци.

Кога заминал за Израел на 13 септември, Бипин ги уверил своите родители дека ќе биде добро: „Ќе го видам светот“. Студентот по земјоделство на непалскиот Фар Вестерн универзитет бил меѓу инаугуративната група од 49 Непалци испратени од неговиот колеџ во Израел, вклучувајќи го и Алумим, кибуц лоциран долж границата со Газа. Идејата на програмата, наречена „Учи и заработувај“, била да се добие увид во израелските земјоделски техники кои можат да се применат во Непал.

Тајланѓаните кои со години работеле во кибуцот, додека учеле хебрејски, знаеле еднаш неделно да направат караоке забава, каде често ги канеле и Непалците. Бипин, кој се занимавал со музика, рапувал за маките на непалските фармери. Секоја вечер, откако му завршувала смената во 10 часот, се јавувал дома да и каже добра ноќ на мајка си.

Тајланѓаните и Непалците биле меѓу десетиците илјади работници донесени во Израел на земјоделска обука во кибуците кои некогаш се потпирале на палестинската работна сила. Кога повремени ракети летале од Газа, избегнувајќи ја израелската противвоздушна одбрана, Бипин ги повикувал своите пријатели од универзитетот  и и им ги покажал ракетите што шарале низ небото.

Речиси веднаш штом Бипин се разбудил од експлозиите на 7 октомври, неговиот телефон почнал да добива видео снимки од други непалски фармери на кои се гледаат ракети како се провлекуваат во раните утрински часови.

Слушајќи како се приближуваат ракетите и пукотниците, Бипин сфатил дека овој напад е поинаков. Непалците и Тајланѓаните се разделиле и побрзале во различни бункери. Каеокоед, кој живеел во домот до Бипин, се избегал на фармата за крави, а потоа на крајот се качил во скривалиштето над фрижидерот, праќајќи ѝ пораки на сопругата: „Не се враќам дома“.

Другите Тајланѓани се сокриле под дрвените маси во кујната, покрај кутиите со кромид и чекале. Како што минувале минутите, еден фармер му дал знак на друг да земе шише виски за да му помине времето.

Во непалскиот бункер, 17 работници се стуткале рамо до рамо во малата соба без прозорци. Тие направиле слика со Бипин, на која сите се насмевнале. Неколкумина ги отвориле своите мобилни телефони за да ја играат видео играта со која поминувале голем дел од времето. Студентот Прабеш Бандари го фотографирал Бипин, објавувајќи на Фејсбук: „Време е за бункер“. „Време е за Лудо (видео играта)“, му напишал друг студент во коментар.

Бипин го кренал погледот од играта за да ги чуе пукотници кои се приближувале, проследени со панични врисоци. Куршумите почнале да ги погодуваат ѕидовите на студентскиот дом.

Израелските закони со кои се бара домовите да имаат безбедна просторија не биле строго спроведени, особено во живеалиштата на земјоделските работници, и било лесно за милитантите од Хамас да провалат. Бил убиен непалски студент во близина на капијата, како и друг кој извикувал: „Ние сме Непалци!“ Две бомби паднале во собата каде се криел Бипин.

Милитантите ја забрзале акцијата и наскоро студентите можеле да ги слушнат гласовите на израелските полицајци кои им кажувале на оние кои можеле да се скријат во блиската кујна. Додека Непалците и неколку Тајланѓани се повлекле во своите скривалишта, Бипин се обидел да ја собере групата за да ги заштити повредените.

Набрзина му напишал неколку пораки на својот братучед Бас Дев на англиски: „Ако нешто ми се случи, треба да се грижиш за семејството. Биди силен и секогаш гледај во иднината“. Еден млад милитант со пушка во рака упаднал во кујната и им наредил на Бипин и тројцата Тајланѓани да излезат. Другиот напаѓач го снимил киднапирањето. Тоа било последен пат кога Бипин бил виден жив.

Додека четворицата фармери исчезнале, Непалците кои сè уште се криеле можеле да слушнат како еден од Тајланѓаните молел да го ослободат: „Тајланд, Тајланд!“ „Дали сте муслиман?” прашал напаѓачот. Бипин не рекол ништо. Во кујната, Непалците кои сè уште се криеле можеле да ги слушнат вооружените лица како врескаат: „Бегајте!“.

Непалската амбасадорка бара одговори кои никој ги нема. Страниците на Фејсбук и групите на Вотсап што го поврзуваат Непал со Израел биле исполнети со слики и пораки од нападнатите студенти кои барале итна помош или лет за дома. Непалците сè уште се криеле, шепотеле страшни приказни во телефонските разговори со амбасадорката Ризал и уште двајца службеници од нејзината амбасада во Тел Авив, кои сега морале да одговараат за стотиците свои граѓани во десетици кибуци, изгубени во земјата фрлена во хаос.

Војниците ги расчистувале пограничните области во близина на Газа, а владите на Тајланд и Непал дошле до Гилад Хонволд, земјоделец во кибуцот Алумим, за да ги слушнат нивните стравови. „Ја чекаме вашата порака за да ја информираме нашата влада“, гласела пораката на неговиот телефон од амбасадата на Непал.

Дали Бипин бил меѓу убиените или Хамас го киднапирал останува мистерија. Неговите пријатели пребарувале видеата од Газа барајќи го неговиот лик. Семејството Џоши од нивниот дом во близина на реката Махакали, постојано го бара Бипин на неговиот телефон, но тоа е безуспешно.

Непалскиот министер за надворешни работи во разговор со катарскиот заменик министер за надворешни работи побара од него да му пренесе порака на Хамас: „Бипин Џоши е невин студент по земјоделство кој треба да биде ослободен“.

Наместо да се обидува одделно да идентификува и да преговара за ослободување на секој поединец од толку многу земји, Катар го охрабри Хамас да ги ослободи сите цивили од секоја нација. Но, Хамас нема да ги ослободи своите заложници додека Израел не ги прекине воздушните напади. И Израел не сака да ги прекине воздушните напади додека Хамас не ги ослободи заложниците. Комплицирајќи ги работите, египетските власти сакаа да се фокусираат прво на преговорите за хуманитарна помош за Газа, а потоа да се справат со затворениците.

Во секој случај, Катар не знае дали Хамас го држи Бипин. Хамас не даде детален список на заложниците. Можеби десетици исчезнати, тврдат лидерите на Хамас, биле киднапирани од терористите кои влегле во Израел за време на хаосот. По две недели, израелското Министерство за надворешни работи во порака до Амбасадата на Непал напиша дека Бипин најверојатно бил киднапиран.

По неколку недели преземање снимки од безбедносните камери од фармите долж границата со Газа и прегледување на видеата со часови, студентот Хонвалд им испратил видео од 22 секунди од четворица мажи кои шетаат по кибуцот Алумим. Тројца од нив изгледале на тајландски студенти и биле свртени кон милитантот кој држел мобилен телефон за да ги снима. Но, Непалецот не можел да се согласи дали четвртиот човек, наведнат во сина маица и шорцеви, всушност е Бипин.

Хуманитарните организации испратиле писмо до амбасадата и полицијата – исчезнатиот Бипин Џоши најверојатно е киднапиран. Дотогаш, други заложници почнале да се враќаат во Израел. На 20 октомври Хамас ослободи двајца Американци, а потоа и две Израелки.

Непалската влада испрати тим во домот на Џоши за да го провери примерокот од ДНК анализите со неидентификуваните тела. Ниту еден примерок не одговарал, а фрустрацијата на семејството расте. Тие и неговите пријатели се собрале во канцеларијата на локалната власт за да протестираат, мавтајќи со натписи „Разбуди се, непалска влада“ и „Спаси го Бипин Џоши“.

„Добиваме само гаранции“, рече мајката Падма Џоши.

И покрај напорите, непалската влада сè уште не може да потврди дали Бипин е жив. Минатата недела американскиот државен секретар Ентони Блинкен ја изрази својата „загриженост за Бипин Џоши, кој и понатаму се води како исчезнат“.