Како што и најави селекторот на српската репрезентација, Драган Стојковиќ Пикси, оваа земја во 2025 година би требало конечно да добие „Национален стадион“.

Според тамошните медиуми стадионот најверојатно ќе го носи името „Србија“ и чија изградба ќе чини околу 257 милиони евра, а Министерството за градежништво, сообраќај и инфраструктура, како и Урбаниот институт од Белград, во понеделникот јавно го претставија идниот изглед.

До стадионот, ќе има и фудбалска академија, трговски центар, а веројатно и музеј на Фудбалската федерација на Србија. Исто така, редовната линија на белградскиот воз ќе оди до стадионот.

– Идниот стадион ќе се наоѓа во делот на градската општина Сурчин, источно од државниот пат, во близина на обиколницата во Белград.

Еден од најмодерните стадиони, од таканаречената Категорија Четири, определена од УЕФА, ќе биде изграден на вкупно 114 хектари државно земјиште, а објектот ќе треба да исполнува многу прецизни и строги стандарди на оваа организација и ФИФА – рече на презентацијата Божидар Бојовиќ од Урбаниот институт во Белград.