Спасовски: Не ми е важно дали во евентуалната широка влада ќе останам министер
На министерот за внатрешни работи Оливер Спасовски не му е важно дали ќе остане прв човек на МВР доколку се формира широка влада. Спасовски вели дека не размислува за неговата лична позиција, туку дека е битно државата да исчекори напред.
„Прво ќе видиме како ќе заврши целиот овој процес на уставните измени . За мене е многу важно дражавата да исчекори напред, да ги отвориме перспективите за граѓаните, пред се за младите луѓе, да покажеме дека одговорноста како политичари пред граѓаните е огромна, така што воопшто не размислувам за моите лични позиции, тоа не е важно, важни се Македонија и граѓаните на Македонија“, вели Спасовски.
Тој одби да коментира дали напредува политичкиот дијалог за уставните измени.
„Владата постојано разговара и презема низа активности коишто ќе значат забрзан чекор кон европските интеграции и тие одлуки се одлуки за граѓаните и час поскорро треба да бидат донесени за да се отвори перспектива за граѓаните. Политчките партии го работат тоа во рамките на партиите и јас денеска не можам да коментирам за политика – рече министерот за внатрешни работи.
Претседателот на ВМРО-ДПМНЕ Христијан Мицкоски во телевизиско гостување веќе изјави дека доклоку дојде до формирање на широка влада, тие ќе побараат со МВР да раководи кадар од ВМРО-ДПМНЕ.
Од Владата пак, на вчерашниот брифинг со новинарите велат дека процесот се уште не е дојден до распределба на министерските позиции доколку разговорите со ВМРО-ДПМНЕ за уставните измени резултира со договор.
На лидерската средба помеѓу премиерот Димитар Ковачевски и претседателот на ВМРО-ДПМНЕ Христијан Мицкоски, минатата недела премиерот му понуди на Мицксоки формирање широка влада во која СДСМ ќе отстапи за ВМРО-ДПМНЕ пет од 10-те министерски позиции.
На вчерашниот брифинг со новинарите од Владата велат дека Ковачевски е подготвен да ја отстапи и премиерската функција на Мицксоки, односно на ВМРО-ДПМНЕ, за уставните измени да бидат изгласани со двотретинско мнозинство, но дека во таков случај Мицкоски како премиер на преодната влада ќе треба да биде и потписник на иницијативата за уставни измени.
И од ДУИ изјавија дека се подготвени да се откажат од премиер Албанец во техничката влада во интерес на изгласување на уставните измени.